“Aviasozlar” bozori odatdagi tartibda ishlamoqda. Olib borilayotgan ishlar qonuniy asosda faoliyat yuritayotgan savdo rastalari va obyektlariga daxl qilmaydi.

Gap uzoq vaqt davomida tartibsiz, oʻzboshimchalik bilan tashkil etilgan savdo mavjud boʻlgan bozorga tutash hududda tartib oʻrnatish haqida ketmoqda.

Ushbu hududda ayrim fuqarolar meva, sabzavotlar, goʻsht mahsulotlari va kalla-pochalarni ruxsat beruvchi hujjatlarsiz, jumladan, sanitariya-epidemiologiya talablarini buzgan holda sotgan. Zarur sanitariya sharoitlari va mahsulot sifati nazoratining yoʻqligi oziq-ovqat xavfsizligi uchun xavf tugʻdirardi.

Bundan tashqari, tartibsiz savdo piyodalarning erkin harakatlanishiga toʻsqinlik qilar, transport harakatiga xalaqit berar, tirbandliklar, odamlarning toʻplanishi, tartibsiz avtoturargohlar va aholi, xaridorlar hamda bozorga tashrif buyuruvchilar uchun noqulayliklar tugʻdirardi.

Shahar maʼmuriyati poytaxtning savdo infratuzilmasini zamonaviy shahar talablariga muvofiq tartibga solish boʻyicha izchil ishlarni amalga oshirmoqda. Ushbu chora-tadbirlardan maqsad nafaqat jamoat joylarida, balki bozorlar hududlarida ham qulay, xavfsiz va obod sharoitlarni yaratishdir.

Shuni taʼkidlash joizki, ushbu hududda savdo qilgan shaxslarga bozor hududidan muqobil, maxsus ajratilgan va qonuniy joylar taklif etilmoqda. Bu joylar tadbirkorlar uchun ham, xaridorlar uchun ham yanada tartibli va qulay sharoitlarni nazarda tutadi.

Oziq-ovqat mahsulotlari savdosi faqat sanitariya sharoitlari taʼminlangan, mahsulot sifati nazorat qilinadigan, xaridorlar uchun qulaylik va harakat xavfsizligi yaratilgan maxsus belgilangan joylarda amalga oshirilishi kerak.

Ushbu hududda ishlar yakunlangach, hududni obodonlashtirish va koʻkalamzorlashtirish, shuningdek, avtomobillar uchun turargoh tashkil etish rejalashtirilgan. Bu tartibsiz avtoturargohlarni kamaytirish, hududga kirishni optimallashtirish va xavfsiz qilish, shaxsiy transportda harakatlanish uchun qulayroq sharoitlar yaratish hamda yaqin atrofdagi koʻchalardagi yuklamani kamaytirish imkonini beradi.