Toshkent shahar hokimligi delegatsiyasi 18–22-may kunlari Finlyandiya va Estoniya Respublikalarining poytaxt shaharlarida ta’lim, yoshlar siyosati hamda ijtimoiy himoya yo‘nalishlarida yo‘lga qo‘yilgan ilg‘or tajribalarni o‘rganish maqsadida xizmat safarini amalga oshirmoqda.

📍Helsinki shahridan boshlangan safarning birinchi kunida delegatsiya Meri bolalar bog‘chasi hamda Vattuniemi boshlang‘ich maktabi faoliyati bilan tanishdi.

🏆Uchrashuvlarda Helsinki shahar merining ta’lim masalalari bo‘yicha o‘rinbosari Shon Haff, hokimning maxsus maslahatchisi Julianna Kentala, shuningdek, ta’lim muassasalari rahbarlari Katariina Laakso va Sanna Soini ishtirok etdi.

🧠 Muloqot davomida Helsinki shahrida ijtimoiy rivojlanish yo‘nalishida siyosiy qarorlar qabul qilish, moliyaviy ustuvorliklarni belgilash tizimi, bolalar bog‘chasi va maktab ta’limi modeli yuzasidan taqdimotlar o‘tkazildi.

📈Kunning ikkinchi yarmida Helsinki shahrining strategik rivojlanish yo‘nalishlari, xususan, 2025–2029-yillarga mo‘ljallangan ustuvor vazifalar haqida taqdimotlar tashkil etildi. Mazkur taqdimotlar Helsinki shahri Strategiya departamenti bosh strategiya direktori Markus Kyun hamda Xalqaro aloqalar bo‘limi rahbari Laura Uuttu-Deshriver tomonidan o‘tkazildi.

🧑‍💻Xizmat safari davom etmoqda. Delegatsiya 22-mayga qadar Finlyandiya va Estoniyada ta’lim, yoshlar siyosati hamda ijtimoiy himoya yo‘nalishlaridagi amaliy tajribalarni o‘rganib, Toshkent shahrida qo‘llash mumkin bo‘lgan samarali yondashuvlar bo‘yicha muloqotlar olib boradi.