«Xalqlar doʻstligi» muzeyi binosi 1976-yilda Toshkent zilzilasining oʻn yilligiga bagʻishlab qurilgan boʻlib, «Jasorat» yodgorligi bilan yagona majmua tarkibiga kirgan. Muzey fondida Toshkentni ittifoq respublikalari qayta tiklaganiga bagʻishlangan 15 mingdan ortiq eksponat saqlangan edi.

Majmua va bino meʼmorlari — L. Adamov, S. Adilov, V. Ganiyev, Farhod Tursunov, R. Yusupov va D. Ryabichev.

Tepalikda qurilgan va stilizatsiya qilingan milliy naqsh bilan bezatilgan silindr shaklidagi bino birinchi qavat ustida goʻyo suzib turgandek koʻrinadi.

1996-yilda, Oʻzbekiston mustaqilligining besh yilligiga bagʻishlab, shu binoda Olimpiya shuhrati muzeyi ochildi. Hozirda unda 2088 ta eksponat namoyish etilmoqda.

2024-yilda «Jasorat» majmuasi meʼmorlaridan biri Valeriy Ganiyev ushbu binoga Xalqlar doʻstligi muzeyini qaytarishni va Olimpiya shuhrati muzeyini boshqa joyga koʻchirishni taklif qildi.