Бугун Халқ депутатлари Тошкент шаҳар Кенгашининг навбатдаги — йигирманчи сессияси ўтказилди. Сессияда пойтахт ҳаёти ва бошқарувида долзарб бўлган масалалар юзасидан масъуллар ахборот ва ҳисоботлари тингланиб, муҳокама қилинди.

Сессия давомида: — Тошкент шаҳар прокуратурасининг 2025-йил якунлари бўйича ахбороти; — Ички ишлар бош бошқармасининг жамоат хавфсизлиги, ҳуқуқбузарликлар профилактикаси бўйича ҳисоботи; — Солиқ бошқармасининг маҳаллий бюджет даромадлари ва солик қарздорлиги бўйича маълумотлари; — Адлия бошқармасининг ҳуқуқни қўллаш амалиёти ҳамда ҳуқуқий тарғибот ҳолати бўйича ахбороти; — Соғлиқни сақлаш бош бошқармасининг 2025-йилдаги ишлари ва болалар саратонига қарши миллий стратегия ижроси бўйича ҳисоботлари тингланди.

Шунингдек, Янгиҳаёт туманида «Келажак маркази»ни ташкил этиш масаласи муҳокама қилинди.

Сессия якунида кун тартибидаги масалалар бўйича тегишли қарорлар қабул қилинди, масъул ходимларга аниқ вазифалар белгиланди.