Yaqinda joriy etilgan va vazifalariga muammolarni tizimli aniqlash, kadrlar bo‘yicha qarorlarni dastlabki o‘rganish, hujjatlar loyihalarini tahlil qilish, manfaatlar to‘qnashuvi xavfini belgilash, korrupsiyaga qarshi talablar, xizmat intizomi va halol boshqaruv tamoyillariga rioya etilishini nazorat qilish kiradigan Komplayens va korrupsiyaga qarshi kurashish bo‘yicha ichki nazorat xizmati faoliyati tufayli bu yo‘nalishdagi ishlar samaradorligi oshdi.

Qabul qilinayotgan qarorlarning shaffofligini ta’minlash, korrupsiyaviy omillarning oldini olish, tanish-bilishchilikka yo‘l qo‘ymaslik hamda professionallik, kompetentlik va mas’uliyat xizmat pog‘onalarida ko‘tarilish va kadrlar masalasida qaror qabul qilishning asosiy mezoni bo‘lgan meritokratiya tamoyillarini ilgari surishga alohida e’tibor qaratilmoqda.

Aniqlangan holatlar va kamchiliklar muammolarning yashirilayotganidan emas, balki ularni o‘z vaqtida aniqlash, huquqiy baho berish va sabablarini bartaraf etishga yo‘naltirilgan tizim ishlayotganidan dalolat beradi. Har bir holat bo‘yicha tegishli choralar ko‘riladi: profilaktik tadbirlar amalga oshiriladi, materiallar vakolatli odob-axloq komissiyalari tomonidan ko‘rib chiqiladi, manfaatlar to‘qnashuvi xavfini kamaytirish va ichki jarayonlarning shaffofligini oshirish bo‘yicha choralar ko‘riladi.

Hokimlik va joylardagi idoralarning kundalik ma’muriy faoliyati ochiqligini oshirish alohida yo‘nalish bo‘lib qolmoqda. Qonunchilikda to‘g‘ridan-to‘g‘ri nazarda tutilgan hollardan tashqari, qabul qilinayotgan qaror va farmoyishlar jamoatchilik uchun imkon qadar tushunarli hamda ochiq bo‘lishi lozim.

Ishlarning bosh tamoyili – muammolarni aniqlash, sabablarini bartaraf etish va takrorlanish xavfini kamaytirishdir. Poytaxt hokimligi ichki nazoratni mustahkamlash, xodimlarning o‘z xizmat vazifalarini bajarishdagi mas’uliyatini oshirish hamda zamonaviy talablarga javob beradigan ochiq boshqaruv tizimini rivojlantirishda davom etadi.